Bahasa Sasak: Permainan Tradisional di Pulau Lombok

Selapuq pekedekan saq tiang tulis niki ye jari pekedekan saq tiang dait sejulu dateng mangkin, maraq base saq lain pekedekan niki jari pekedekan saq araq leq gubuk tiang mesaq. Lamun araq pekedekan saq ndeqman tiang sebut leq tulisan niki jaq tiang nunas ampure tipaq pelungguh selapuq.

Pekedekan saq ndeq bau telupaan siq kanak kodeq saq idup leq repoq, silaq pirengang:

Daprak

Pinaq gambar maraq gambar leq atas, gambar saq kiri te kadu mun te yaq maen bemesaq-mesaqan. Mun gambar saq kanan te kadu mun te maen pepasang-pasangan. Gambar nike tepinaq leq bawon tanaq saq elah dait datar. Selain gambar nike saq yaq maen endah butuh katuq saq bau tepinaq lekan telaweq atawe batu-batu kodeq. Gambar nike tebagi jari empat bagian nae saq nomer sekeq (1), keletek nomer due (2) dait nomer nem (6), awak nomer telu (3) dateng nomer pituq (7) saq paling atas aran otak (8).

Aturan entan te maen “Daprak”:

- Pinaq gambar maraq gambar leq atas.

- Ndaq lupaq sadang katuq

- Sut atawe pemprang mun te yaq pileq sai yaq maen/makeq bejulu

- Jari penembeq lepas katuq leq loang nomer sekeq

- Sekeq kotaq/loang kanggo te icaq/genjah kadu setoeq nae, nae saq kanan doang

- Lampaq lekan nomer paling kodeq (1) dateng nomer paling beleq (8) terus tulak malik jok nomer saq paling kodeq.

- Mun kotaq saq bepacek (2-3) dait (6-7), nae kiri begenjah leq nomer genap, nae kanan begenjah leq nomer saq ganjil.

- Bait mun katuq wah dateng otakn, laguq balik awak leq loang no nem-pituq, tidem, terus dore katuq saq leq mudi.

- Sawut katuq adeqne sugul, ndaq jaoq laloq. Kiraqn sekitar selengkaq.

- Ulang entan saq main pertame leman otak dateng sugul malik lekan no. sekeq.

- Pileq bale, temudiq gambar, sawut adeng-adeng katuq tipaq mudi.

- Nae, ime, dait katuq ndeqn kanggo bakat garis saq leq gambar nike.

Main Kasor

Pinaq gambar maraq gambar leq atas leq tanaq saq elah daoit datar. Sadang katuq.

Aturan entan te maen “Kasor”:

- Sut atawe pemprang mun te yaq pileq sai yaq maen/makeq bejulu

- Jari penembeq lepas katuq leq loang nomer sekeq

-Kasor katuq sampai sugul lekan nomer baluq (ndaq lupaq kasor katuq sesuai urutan nomer)

- Mun wah sugul, sawut katuq jok loang nomer due, terus kasor maraq entan saq baruq. Sawut katuq sampai penutuq leq nomer baluq.

- Mun wah inggas, karing endeng bale.

- Misal lawan ngebeng side loang nomer telu, side temudik gambar sawut katuq adeng-adeng jok nomer telu.

- Nae, ime, katuq ndeqn kanggo betelah leq garis gambar.