Bahasa Sasak: Ceramah Singkat Bahasa Lombok

Assalamualaikum Warahmatullahi Wabarakatuh.

Inaq Amaq Semeton jarin tiang senamian silaq te bareng-bareng memuji syukur tipaq de side Allah Subhanahu wata'ala. Sengaq de side Allah ta'ala saq jari raja selapuq alam ican tiang pelungguh sehat dait sempat sehingga tiang pelungguh bau hadir leq taoq saq solah dait insyaallah berkah niki.

Nenten tiang pelungguh lupaq ngaturang sholawat salam tipaq kanjeng Nabi Muhammad Shallallhu Alaihi Wassalam. Berkat de side Nabi saq te utus siq Allah Ta'ala, leq langan saq sampun te bimbing siq de side Nabi Muhammad Shallallhu Alaihi Wassalam tiang pelungguh te jauq leman jaman saq peteng dendeng tipaq jaman saq menah tandur, minazzulumati ilannuur.

Inaq Amaq Semeton Jarin tiang senamian, leq kesempatan saq solah semangkinan niki tiang nunas ijin ngaturang ceramah kontek leq julun pelinggih senamian. Tema ceramah tiang leq jelo semangkinan niki taing ngaturang penting pendidikan moral.

Inaq Amaq Semeton Jarin tiang senamian, tiang pelungguh sampun wikanan bahwa kehidupan masyarakat leq taoq tiang pelungguh sanget dipengaruhi siq perilaku moral selapuq warga. Mun solah moral tiang pelungguh saq jari warga insya allah yaq ne solah kehidupan te bermasyarakat. Laguq mun lengen moral tiang pelungguh yaq ne lenge endah kehidupan bermasyarakat te.

Silaq tiang pelungguh jagaq diriq lengan titi tata cara lamaq langan saq ndeq solah. Lebih-lebih leq jaman saq modern niki, tiang pelungguh seleke mudaq gaweq apejuaq siq yaq tiang pelungguh kayunang. Maraq misal perkembangan teknologi informasi unin teparan nike, jari penyebaran raos-raos dengan saq lekan duah becat gati sampe leq tiang pelungguh senamian. Informasi saq solah endah informasi saq ndeq solah, ye ampoq tiang pelungguh perlu araq saringan, saq mbe saq perlu tiang pelungguh wikanan saq mbe saq ndeq perlu.

Salaq sopoq ntan tiang pelungguh leq dalam te berusaha menciptakan titi tata cara kehidupan masyarakat  saq bermoral adalah tiang pelungguh mulai lekan generasi saq bajang. Tiang pelungguh wikanang siq teparan aran generasi bajang niki sanget siq ne berpengaruh leq masyarakat. Loeq titi tata cara kelampan idup generasi bajang saq solah, ye jari conto tipaq saq lain. Mun araq saq kurang solah endah jari pelajaran adeq tiang pelungguh ndaq maraq nike.

Loeq cara saq bau tiang pelungguh kadu leq dalam tiang pelungguh coba pesolah moral generasi bajang leq taoq tiang pelungguh masing-masing. Misal saq pertama, Kenalang generasi bajang pendidikan agama lekan masih kodeq. Selaku dengan toaq endah bau tiang pelungguh senamian sharing informasi-informasi saq bau gugah angen anak-anak tiang pelungguh adeqne terus semanget berajah, tuntut ilmu saq solah.

Tentu siq penting bagi tiang pelungguh senamian saq jari dengan toaq, tokol bareng dengah napi saq jari masalah atawe keluh kesah generasi bajang adeqn saq bau endait solusi leq maslaah saq araq. Adeqn saq tetep kenaq cara bekelampan leq jaman niki. Budaya saling tulung atawe maraq base batur laeq budaya gotong royong terus tiang pelungguh jagaq.

Harapan tiang, selain isiq ceramah endah penting tiang pelungguh ngebeng conto-conto saq solah tipaq generasi bajang. Semoga tiang pelungguh leq jaman sa modern niki te kican angen saq solah, anak-anak saq soleh. Dait semoga tiang pelungguh senamian telindungi siq de side Allah Ta'ala lekan selapuq jenis angen dait perilaku saq ndeq solah.

Maraq nike cermah singkat saq bau tiang hatur le kesempatan niki, mun sekiranya araq kata atawe raos saq ndeq onyaq tiang nunas ampura.  

Jari penutuq tiang tutup ceramah niki dengan ucapan salam,

Wassalamualikum Warohmatullahi Wabarokatuh.